Eth Plen deth Conselh Generau d’Aran a aprovat per unanimitat er autrejament deth Prèmi 17 de Junh 2026 ath grop de teatre Era Cabana, en reconeishement ara sua destacada trajectòria e ara sua aportacion ara promocion dera lengua e dera cultura araneses ath long des darrèrs vint ans.
Es Prèmis 17 de Junh an coma objectiu reconéisher e arregraïr annauments aqueres persones, collectius o entitats que, pes sòns merits e servicis balhadi ara Val d’Aran, an contribuït a dignificar e aunorar eth país en encastres coma era vida sociau, culturau, esportiva o economica. Eth guerdon ei representat pera figura de Blancaflor, protagonista dera legenda dera Maladeta recuelhuda per mossen Jusèp Condò, simbèu dera identitat, era fòrça e era capacitat de persisténcia deth pòble aranés.
Eth grop de teatre Era Cabana a estat reconeishut pera sua labor continuada en favor dera lengua pròpria d’Aran e pera sua capacitat de convertir er aranés en un veïcul naturau de creacion artistica, de convivéncia e de transmission de valors culturaus. Ath long de dues decades, eth grop a apropat eth teatre ara societat aranesa e as naues generacions, en tot contribuïr a mantier viua era lengua e a reforçar eth sentiment d’apertenença comunitària.
En sòn acòrd, eth Conselh Generau d’Aran destaque qu’Era Cabana a sabut transformar er art en un espaci de trobada e participacion collectiva, en tot demostrar qu’era cultura hèta des deth territòri pòt èster ath madeish temps arraïtzada e universau. Era institucion vò reconéisher tanben tot eth trabalh desvolopat pera directora e autora deth grop, Manuela Ané, atau coma era implicacion de totes es persones que, ath long d’aguesti vint ans, an format part d’aguest projècte culturau.
Eth Prèmi 17 de Junh serà liurat en un acte solemne organizat peth Conselh Generau d’Aran, en encastre des actes commemoratius dera Hèsta d’Aran. Damb aguest reconeishement, eth Conselh Generau d’Aran vò exprimir eth sòn arregraïment ara labor realizada per Era Cabana en favor dera lengua, era cultura e era coesion sociau dera Val d’Aran.
